"Eylə" şeir (Nanə Yavərqızı)
Eylə
Nanə Yavərqızı
Vətən, məni al qoynuna,
Ocağında közün eylə.
Gün çırtanda səhərçağı,
Elə baxan gözün eylə.
Bulağından damla-damla,
Axıb gələn öz yoluyla,
Çaylarından hay-həşirlə,
Dolaylarda düzün eylə.
Haçaquyruq qayalarda,
Qaya üstü mamırında,
O tay, bu tay dağlarında,
Daşlarında izin eylə.
Daha açmır sünbüllərim,
Solub, gedib lalalarım,
Bircə sənsən varım, yoxum,
Çəmənlərdə gülün eylə.
